Alpauftrieb 30. Mai 2020

S'johr hät nid guet agfangä
und trotz all denä Problem händ mir uf dä Alpuftrieb plange.

Früeh am Morge händ mir müessä ufstoh
und mit dä Achof bis zum Fruggeli go.

Döt händ mir uf diä anderä Burrä und Helfer gwartet,
Wo alli parat gsi sind, sind mir gstartet.

Wie immer sind mir über dä Schöbüehl, dänn is Hinter Tal und am Schluss nuch diä steili Planggä ufä gstiegä.
Nur zwei Geissä händ gmeint mir bliebet besser do undä liegä.

Aber zum Schluss händ sie nochä geh,
jetzt chasch sie vergnüegt am weidä gseh.

Diä zwei Röslis und Primula hend für üs feini Älplermaccrone gmacht
und Kaffi und Chuechä das eims Herzli lacht.

Allnä Helfer ganz herzlichä Dank
und bis im Herbscht wieder bi Spies und Trank.